tekse 

* ’t Limburgs kwarteerke (Nieuw)*Blauw Sjuut Rhapsody (Nieuw)
* TWIEËMOAL AAFGEZEËG (EN NOG TE KÓT)  * D'R LOEMELEKRIEËMER (LOEMELE)
* HINGE GEN HERGOD'S VOT * DE OUW VROUW SILVERTANK  * MOELE MÓSSE KINNE
* ÓS KOER (AU SECOUR!)  * D'R REMMIE-DEMMIE  * DOEBELE BOAM  * VASTELOAVEND HELLE
* DE FRIETEBOET  * MÓTTE, MÓTTE, MÓTTE  * HEI GEBLIEËVE  * OUWE KROAM  * Heëlesj vólksleed

’t Limburgs kwarteerke
Wöad: Paul Münstermann & Leo Keularts  Moeziek: Paul Münstermann
Refring
’t Limburgs kwarteerke
Dat is ee sjtuk van ós kultoer
’t Limburgs kwarteerke
Hant vier d’r tied, hant zie de oer
‘t Limburgs kwarteerke
Dat kriet me ós neet aafgelierd
‘t Limburgs kwarteerke
Zoeë weëd i Limburg ’t leëve gevierd

Te laat… te laat…

Koeplet 1
D’r baas houw geer vergaderd, zoeë um ’n oer of ing
Mè tieën minute later zoot heë nog gans alling
Wie noa ee klee kwarteerke d’r zaal toch woa gevuld
Houw heë ze óp zie hollensj ins kreftig aagebruld
Mè ginne deë ’t sjnapde, ze woare ’t nui kwiet
Vuur Limburgse begrippe woa me toch sjun op tied?

Te laat… te laat…

Koeplet 2
Vier vasteloaveszeng’re hant ummer vöal te doeë
dat me zich döks mót touwe, dat is noe eemoal zoeë
Mè woa me ooch mót zinge, i Venlo of Mestreech
Went vier genau op tied zint, brent doa nog lang gee leech
Wat hat me van dat jage, ’t lup toch ummer oet
En kómme vier get later, da zingt de ganse boet

Bruk
Wat mörge mót gebure, moeët gistere veëdig zieë
I Limburg hat ee sjtundje toch ee kwarteerke mieë
 

Blauw Sjuut Rhapsody
Wöad: Paul Münstermann, Leo Keularts Moeziek: Paul Münstermann
Refring
Sjuutje vare óp de bare
Van ós Limburgs lank
Lüj verbinge, sjtumming bringe
Fes mit joeks en zank
Vief moal elf
De gekke zelf
D’r salvo es saluut
Leëve d’r vasteloavend
Alaaf vuur de Blauw Sjuut
Leëve d’r vasteloavend
Alaaf vuur de Blauw Sjuut

Heële
Heële is hön heemetstjad,
D’r aavank va d’r toch
Sjtolse keëls mit boek en sjnauts
Oet doezende gezóch
Keëtelbinkie, kapitein
Mit kwetsjbül en kanón
Ze vare oet mit vöal kamau
Mit reëge, wink en zón

Mit pieng in ’t hat
Zeët me adieë
Vuurdat ’t anker geet
Bis gauw leef sjtad
En haot dich vrieë
Es aafsjeed klinkt dit leed

D’r Lange Jan marsj

Kirkroa
Kirkroa is ing plieësterplaatsj
Hön have is d’r maat
Wie ummer weëd doa tol betaald
Dat kump döks oet ee vaat
Vregele en sjteggele
Wie koempels óngeree
Al weëd me döks vuur gek gezat
Geet me es vrung oetee

Mit pieng in ’t hat
Zeët me adieë
Vuurdat ’t anker geet
Bis gauw leef sjtad
En haot dich vrieë
Es aafsjeed klinkt dit leed

’t Sjunste óp de welt

Oake
Doa geet de sjuut óp Duutsjland aa
Noa Oake óp d’r plei
Sjnoar en sjnak, de Garde sjteet
Wie ummer sjun d’r bei
Al liekt ’t sjtief en vörmelich
Is hat’lig d’r ontgvangs
En weët de sjlieps dich aafgeknip
Doa kump me toch neet langs

Mit pieng in ’t hat
Zeët me adieë
Vuurdat ’t anker geet
Bis gauw leef sjtad
En haot dich vrieë
Es aafsjeed klinkt dit leed

Der Fliegermarsch

Mestreech
Kiek doa, de have va Mestreech
Rechoet, genau óp koers
Al is de Sjuut óch nog zoeë sjun
Toch neume zie dem boers
Ze kape en ze entere
Bemanning in ’t kesjot
En weëd doa nog ing sjtrieëk gesjpild
Da lach me zich kapot

Mit pieng in ’t hat
Zeët me adieë
Vuurdat ’t anker geet
Bis gauw leef sjtad
En haot dich vrieë
Es aafsjeed klinkt dit leed

Mestreech is neet breid
 

TWIEËMOAL AAFGEZEËG (EN NOG TE KÓT)
Refring
Doa komme v'r noeëts va ze leëve mit noa boete.
Dat kient v'r noeëts va ze leëve oet de sjuur.
Doa komme v'r noeëts va ze leëve mit noa boete.
Dat kient v'r noeëts va ze leëve durch gen duur.
Inne poekel van 't duie en de nerve ram kapot.
Doa komme vier noeëts va ze leëve mit noa boete.
Twieëmaal aafgezeëg en te kót.

Es thema vuur d'r wage houwe vier e good idee.
'ne dieke bulles va papier maché.
Vier hamerde en sjoesterde bis drei oer in de nach.
't Woeët al ummer groeëter en vöal sjunder da verwach.
Vier bouwde in 't blómmesjuurke va d'r Koale-Frens.
Me wie 't entlich veëdig woa, doe zag inins d'r Hens:

Vier hant d'r aa getrókke en mit elf maan geduid.
D'r waan woa evvel vöal te groeët gegruid.
Wat hant vier ös gevregeld, al d'r duvel geprobeerd.
Van al dat sjurge is ós bauw d'r waan versjangeleerd.
Vier hant get sjuns óp lager, me v'r kriege 't neet d'roet.
Noe bel toch mit de brankweer, want d'r optoch lup al oet.

Vier hant 'm middurch gezeëg en hant de heng vol kweëte.
Vier dreumde van d'r ieëjste pries, dem kinne vier vergeëte.

 
D'R LOEMELEKRIEËMER
De ouw versjlieëte kleier, die woeëte nui bewaard.
Wat wier nog va sjtof woar, dat woeët beiee gesjaard.
De Mam doog doamit poetse, al goof dat dökker sjtriet,
want went deë keël da langs koam, da woar ze die wer kwiet.
Ins in de zoevöal weëke, koam heë wer durch de sjtroat,
van hinge op zie kerke, zóng heë da in de moat:

Refring
Loemele, loemele, hadder loemele, koom, kiek ins in de kis.
Loemele, loemele, loat ins kieke wat bei uch gezuëmerd is.
Loemele, loemele, koom me hei doamit en bis neet zoe verleëge.
Hingt deë pungel an de woag, da is en bliet 't me de vroag:
Vilt 't mit of vilt 't teëge.

Wie mieë me houw gezuëmerd, wie beëter woar d'r toesj,
al houw me döks d'r indruk, dat hendig woeët gefoesj.
Want vuur 'ne pungel loemele, bauw fossjer wie e kink,
kreeg me ee gans klee pupke, neet groeëter wie 'ne pink.
'ne Winkvoeëgel, ee muëleke, ee piepke gans va eëd,
al woare 't kling prulle, 't woar toch de muite weëd.

Wat houwe vier döks nerve, went heë an 't woage góng,
want noeëts loot heë get blieke, wat of heë d'r va vóng.
En went 't jüs te min woar, da góng-se durch gen hoes,
en sjnapdes watse kriege kós, joa zelfs de sjiekste bloes.
't Sjtüpke va d'r Opa, de lakes va ge bed,
d'r pungel van d'r pap en va de Oma 't korset.

'ne Winkvoeëgel, ee muëleke, get klings va posjelei.
Mit de hatteligge grus va Loemel-Paul en Loemel-Lei.
 

HINGE GEN HERGOD'S VOT
Refring
Hinge gen Hergod's vót, joa, hinge gen Hergod's vót,
't letste gleëske woeët versjót, hinge gen Hergod's vót.
Hinge gen Hergod's vót, joa, hinge gen Hergod's vót,
't letste gleëske woeët versjót, hinge gen Hergod's vót.

Sjtel uch vuur, 'ne klinge plei, mit sjieëm va lingebeum d'r bei,
ing krütsing in 't centrum va de sjtad.
't Broesde va bedrievigheed, va leëve en gezelligheed,
ing plaatsj woeë oeëts de trem gevare hat.
Ing wieëtsjaf (lü, en wat vuur ee!), loog hinge e groeët krüts va sjtee.
En ummer woa doa sjtumming in de boet,
D'r Hergod trók zich dat neet aa, heë sjtong doa mit d'r ruk op aa,
en bei de biech koam alles toch wer oet.

Oet Holland of oet Ingeland, va jieker rang en jieker sjtand.
D'r tieëkegenger vool zich doa wie heem.
En houw me zich beiee gepak, da woeët noch vlot get kui gemak,
get sjpek en ei, ing doebele mit zeem.

En woa 't toeppe da gedoa en wool me wer op heem agoa,
da woa 't sjtüpke döks e "hoeëg" probleem.
Want wool me da eroet get flot, da vool me zich de bóks kapot.
Ich vroag uch: wie vertelse zoeëget heem ?
 

DE OUW VROUW SILVERTANK
Refring
De ouw vrouw Silvertank, die hat de moel verbrank
Joa zelfs de naas die is gans roeë
De ouw vrouw Silvertank, die hat de moel verbrank
Ze kan de pütsj neet oape doeë
Ze zou va alles wille zage, mè ze kan ’t neet verdrage
Want heur bakkes deed zoe wieë
De ouw vrouw Silvertank, die hat de moel verbrank
Ach, kank dat ummer mè zoeë zieë

Zoeë midde in ‘t huëvellank,
doa woeënde de vrouw Silvertank,
zoeë richtig dörps aod wief
‘t leed va ang’re zóch ze zich
en zoog ze dich da vroog ze dich
‘t hemme va ge lief
Ze moelde sjtónde aa ee sjtuk
va anger lüj hön ongeluk
ópins woa dat gedoa
me zoog heur neet mieë boete
en dus doge alle poete
oet de sjtroat hem sjtiekum noa

D’r dokter woeët d’r bei gehold
Ze woeët ins aan de bletsj gevóld
Die zoot va bloare touw
Doe hat heë zich ing sjpang gepak
En alles ins good ring gemak
En goof heur elf daag rouw
Doa geet ze noe, noe kiek heur goa
Ze durf va sjand neet sjtil te sjtoa
En kalle kan ze neet
De pütsj mit watte volgeprop
Zoe hant ze heur de moel gesjtóp
En jóng, dat deed ‘m leed
 

MOELE MÓSSE KINNE
Refring
Moele, moele mósse kinne
Moele, ummer went ’t mót
Moele, moele, moele, wie ‘ne permetiekel
Moele, moele, moele, wie ing endevót

D’r inne dinkt: „Wie kóm ich oeëts d’r tussje?”
D’r angere dinkt: „Wie sjtóp ich dem de moel?“
Hei is wer inne mit zoeng groeëte waffel
Die houwse vreuger óch al óp de koel
Mesjien waal noeëts ee vak gelierd
Toch wit heë al van al
En hingt heë ós de vót oet
Mit deë sjeële, sjtómme kal

Ze zage waal ins: sjpreëke dat is zilver
Ma mit vöal zilver gilse dich ’t good
Dus wenste ’t mit zjwiege wils verdene
Hat doa zoeë ieëmes nieks mit an d’r hood
In ’t besjtuur va d’r verein
Of in d’r pólitiek
Ze make ummer get va nieks
En make zich da diek

Weë dökser ónger lüj verkiert
Deë wit wat vier bedoele
Geliek of neet, dat is egaal
Me Mót good kInne moele!
 

ÓS KOER (AU SECOUR!)
Me dinkt dat solozang ’t grutste good van al is
Me mingt dat hei alling “’t nachtegaaltje zingt”
Loat uch gezag zieë dat alling óch mè alling is
’t is jüs d’r koerzang deë wie zeem de zeng’re bingt
Vuur ós gee vusje, ginne sjport, en óch nieks óp d’r tillevies
Vier hónt óch nieks mit pielkes werpe óp ing moer
Gee twieëde hüske óp de hei, gee twieëde weëgelke d’rbei
Nieks is zoe sjun es wie te zinge bei ‘t koer

Bei ‘t koer, bei ‘t koer, nieks is sjunder wie te zinge bei ‘t koer
Bei ‘t koer, bei ‘t koer, nieks is sjunder wie te zinge bei ‘t koer

Ee koer is mieë es mè alling get same zinge
Dat züste good ’t ‘s-dieënsdigs-oaves óp de proof
D’r ieësjte kump al ruum ing haof sjtónd va te vuure
En gieët ee rundje óch al went dat gaar neet hoof
’t ganse dörp weëdt durchgesjtrup, de letste wiets weëdt zich verteld
of ee verhoal va de kónzertrees óp ’t Dütsj
me zörgt dat me nog inne kriet, want kloksjlaag ach da is ‘t tiet
sjteet jiek’re zenger mit de moeziek vuur de pütsj

Noe huur toch óp en zaag neet dadder neet kint zinge
Dier zingt toch allenui went ieëmes jörig is
En wat te dinke va die daag mit Vasteloavend
Da zingt dier óch, of zaan mich, han ich ‘t noe mis
De keël weëdt örendlig gesjmierd, mit beer es doping vuur de sjtum
De sjieke noeëte gónt de ledder óp en aaf
Da klinkt ‘r mit e groeët sjandaal d’r letste sjlager durch d’r zaal
En weë neet zinge wilt deë reup geweun: alaaf

Zinge is ós leëve, zinge bei ‘t koer
’t kan nieks sjunder geëve, zinge bei ’t  koer
 

D'R REMMIE-DEMMIE
Refring
Vier danse d'r Remmie-Demmie
D'r samba va Sjpassemig
Vier danse d'r Remmie-Demmie
Ich mit dich en doe mit mich
Vier danse d'r Remmie-Demmie
dem hant vier pas dit joar gelierd
mè jüs durch d'r Remmie-Demmie
hant vier in joare neet zoe good gevierd
mè jüs durch d'r Remmie-Demmie
hant vier in joare neet zoe good gevierd

D'r inne deë wilt lieëver zitte
D'r angere bliet lieëver sjtoa
D'r inne zou 't leefste pitte
D'r angere neet óp heem aagoa
D'r inne deë gieët geer zie geld oet
D'r fenningfutser telt ‘t noa
Mè lüj blief noe ins efkes in de boet
D'r oavend is nog neet gedoa
Mè lüj blief noe ins efkes in de boet
D'r oavend is nog neet gedoa

In Heële zinge vier al joare
Van Doe bis doe en ich bin ich,
Van drei moal Wink en drei moal Heële
Van Lange Jan en Sjoenkel mich
D'r Oambusj en d'r Tuutebulles
Va Heële hei en Heële doa
Mè hüj dónt vier d'r Remmie-Demmie
en loate ‘m noe nog ins goa
Mè hüj dont vier d'r Remmie-Demmie
en loate ‘m noe nog ins goa
 

DOEBELE BOAM
Refring
Mit (óp) ‘ne doebele, doebele, doebele doebele boam
inne doebel boam, inne doebele boam
Mit (óp) ‘ne doebele, doebele, doebele doebele boam
Kins-te durchgoa bis d’r letste oam

Gebrek aan inspiratie
En ging wöad mie in d’r kop
Al joare góng ‘t klasse
Mè ópins doe woar ’t sjtóp
Heë kós gee book mie sjrieve
Vroog d’r oetgeëver um road
Deë zag hem mit ee zoer gezich:
“D’r humor ligk óp sjtroat”

D’r Sjarel hilt va oetgoa
Mè neet óp d’r nucht’re maag
Heë is zoe druk mit wirke
Dus heë it nieks durch d’r daag
‘t ’s oaves vuur heë voet geet
bak heë flot get sjpek en ei
went ang’re al óp heem aa zint
da is heë nog d’r bei

D’r twieëling woa get leppig
Vöal sjpektakel en sjandaal
Al doog de Mam ins sjoebe
Woa hön dat toch sjietegaal
Mè wie ze ze doog zage
Wie of zoeëget vreuger góng
Doe woare ze gebendigd en
gans ruiïg wie ze zóng:
 

VASTELOAVEND HELLE
Refring
Joa Vasteloavend helle
ee lekker beer besjtelle
d’r nuie prins oetrope
en och d’r óptoch lope
mit de ouwwiever sjpringe
d’r letste sjlager zinge
mit de kapelle trekke
en lekker blieve plekke

Gee groeëter leed es wat d’r miensj zich zelf aadeet
Dat hant vier ós al deks gezach
Mè wat me zoeë mit Carneval verdraage mót
Dat hat d’r duvel zelf bedach
Boete is ‘t kaod en binne vöals te werm
D’r sjmienk lup va die bakkes aaf
Ze sjtónt dich óp de tieëne en ze sjtoeëte dich um
Toch hilste poal en reups alaaf

Zjwaam hingt wie inne nieëvel teëge d’r plafóng
‘t Water lup van de tapieët
‘t Hüske is verenderd in ee waterballet
Wie sjun toch dat ‘t zoeë get gieët
De moeziek geet voloet en e kapelke kump i
Doe kins dieng eege wöad neet versjtoa
Al broek ich noa dees daag wie ummer twieë daag verlof
Toch blief ich jieker joar wer goa

En wenste nieks verdrage kins da blieste ma heem
 

DE FRIETEBOET
Refring
't is vasteloavend,
en gieker oavend
da sjteet de ganse sjtad wer in de frieteboet
sjtónt ze te helle
vuur te besjtelle
mit vasteloavend it joa jieëkerinne oet
va vuur bis hinge
sjtónt ze te dringe
ich sjtoa al sjtónde mè koom koalik get vuuroet
mich lup ‘t water in de moel va de kótlette
de frikadelle, de vleesjkrokette,
ich han de kneup aaf mè ich kan mich nurges zette
ich bin waal binne mè wie kóm ich sjtrak wer d'r oet

ich kóm es letste binne en ‘t liek waal of ich sjtuur
de boet is vol, ich sjtoa gans hingenaa
de ouwesj sjtónt te duie en de poete sjtrietse vuur
ich haot mich i, mè loop al gans roeëd aa

nog dartieën lüj zint vuur mich dus dat doert ing ganse tied
d'r keël vruëgt endlich wat ‘t da maag zieë
ich wil get goa besjtelle mè ich bin mie breefke kwiet
ich wós ‘t mè ich weet ‘t noe neet mieë

ich hoal mich heem ‘t breefke en sjtoa endlich aggen duur
d'r frietekeël zeët: "gank ins aggen zie,
die jónge hónt besjproake, dus die gónt nog effe vuur."
ich drieën mich, sjteet mich doa de harmenie...
 

MÓTTE, MÓTTE, MÓTTE
Refring
Mótte, mótte, mótte, jóng, d’r tied geet mich te vlot
en móste noe ins kieke watter allenui nog mót
Mótte, mótte, mótte, jóng ‘t leëve is zoe kót
Weë bang is vuur te valle zet zich noe mè óp gen vót

Wen ich ‘t smörges ópsjtoa vilt ‘t daak mich óp d’r kop
ich mót vanaal, al joare lank, en dat hilt neet mie óp
dit nog doeë en dat nog doeë, ich gun mich gaar ging rouw
bin veëdig mit de nerve, zaag, woeë mót dat toch noa touw?
Mè hüj is nieks te mótte, weë neet wilt is zelver sjoot
Weë mót deë geet mè heevesj en weë wilt deë deet ‘t good

Duie, trekke, valle, ópsjtoa, touwe mót ich mich,
en weë alling mè umkiekt vilt nog plat óp zie gezich
en wenste ‘t geveul has daste endlich veëdig bis,
da hoof nieks mieë, da kint nieks mieë, da likste in de kis
Ma hüj is nieks te mótte, weë neet wilt is zelver sjoot
Weë mót deë geet mè heevesj en weë wilt deë deet ‘t good
 

HEI GEBLIEËVE
Refring
Ich zou zoe geer trük óp heem aagoa
In mienge kloon langs d’r óptoch sjtoa
Bei de kapel óp de trómmel sjloa
En noa d’r püs went ’t is gedoa
Weë uëverwintere i Sjpanje deed
Of in Tirool óp de latte sjteet
Mit Vasteloavend neet viere geet
Jóng, deë deed mich leed

Wie heë noa sjoeël góng en óch wie heë sjtudeerde
Hou heë mit Krismes al wer zin in Carneval
Óch wie heë inne kier zieng eege vrouw verseerde
In de wieëtsjaf óp ’t groeët Ouwwieverbal
Mè doe inins hou heë da mit zieng vrouw besjloate
Um mit de kinger noa d’r wintersjport te goa
Mè noaderhank dach heë: “hou ich ‘t mè geloate:
Ieë ich wer trük bin is de Carneval gedoa!”

Ze woare alletwieë al wiet uëver de sestig
En vuur de Carneval vónge ze zich te aod
Zoeë in d’r wingter woa dè sjnei alling mè lestig
En boete woa ’t trouwes zoewiezoe te kaod
Dus pakde zie zich ee hotel in zónnig Sjpanje
Va d’r elfde va d’r elfde bis april
Tussje de meëdjes mit bikinis en vöal franje
Zach zie ópins aan hem: “sjat, witste wat ich wil?”
 

OUWE KROAM
Refring
Ich han 't vasteloavends-virus
En dat bin ich nog lang neet kwiet
Ich han 't vasteloavends-virus
Ich weet neet woa me dat va kriet
Ich han 't vasteloavends-virus
't zit mich eemoal in 't blood
Ich han 't vasteloavends-virus
en doarum vier ich me ins good

Heële hei, Heële doa,
‚t sjunste óppen eëd
Winkbül hei, Winkbül doa
De leeftse wie me zeët
Drei daag lank, hei en doa
Kiek ze mè ins goa
Sjpassemig hei, sjpas mich doa
Weë deed ós dat noa?

Heële, Heële, loat dich nog ins zieë
Doog ins mit of kinste dat neet mieë
Want wentse va dich eege inne zökkezeumer bis
Da haste mit de Carneval dat sjpas-geveul gemis
Dus lach ins, sjpring ins, zing ins mit ós mit
en loat ins zieë wat richtig in dich zit

Vier hant sjiech, vier hant sjiech
Aal wat mót dat bliet ma sjtoa
Aal wat maag dat weët gedoa
Vier hant sjiech, vier hant sjiech
Drei daag óp en drei daag aaf
Hüj is carneval, alaaf

Drei daag in 't joar da deet de sjtempelklok 't neet
Ginne deë nog wirkt, alling d'r baas, deë hat zie leed
 
 

Kiekt vuur angere tekse bie ut Hilde:
www.LimburgZingt.nl